Како дел од програмските активности на Македонското Монтесори Здружение, овој месец заврши уште еден циклус на Воведна обука за Монтесори падагогија.
На завршната сесија М.П. (психолог) истакна „Длабочината и широчината на наставната програма обезбедија темелно разбирање на филозофијата на Монтесори, од нејзините историски корени до нејзината практична примена во училницата. Практичната обука со материјалите на Монтесори беше особено вредна, што ми овозможи од прва рака да видам како овие алатки го олеснуваат учењето преку истражување и откривање. Понатаму, акцентот на техниките за набљудување ме опреми со вештини за поефективно разбирање и одговор на индивидуалните потреби на децата. Програмата не само што ги исполни, туку и ги надмина моите очекувања, обезбедувајќи цврста основа за имплементација на принципите на Монтесори во наставна практика.“

Обуката се реализираше во периодот од февруари до јуни 2024 години, во просториите на Монтесори центарот каде 11 учесници можеа да стекнат директно практично искуство и да ја почуствуваат атмосферата на Монтесори училницата.  

На наше големо задоволство изминатата седмица бевме посетени од г-ѓа Габи Штефан, Монтесори експерт од Германското Монтесори Здружение. Г-ѓа Габи Штефан е еден од трите експерти кои беа ангажирани од германска влада со цел поддршка за осовременување на системот на детска заштита во РМ и во 2003 година ја започнаа обуката за Монтесори педагогија. Таа е долгогодишен следбеник и поддржувач на активностите на Македонското Монтесори Здружение и пред се советник во практикувањето на  Монтесори педагогијата. 
По неколкудневната опсервација во групите и дискусијата со вработените таа даде позитивно мислење за нашата работа што за нас е потврда за обезбедениот квалитет.

Во насока на обезбедување квалитетни и достапни социјални услуги во заедницата изминатиот период, 11 Граѓански организации (СОС ДЕТСКО СЕЛО; Хуманост; Хера, Македонското Монтесори Здружение, Порака – Неготино, Кризен Центар Надеж, Отворена Порта, ХОПС, Инклузива,  Здружение на лица со церебрална парализа и други попречености- Велес и КРИК) кои се лиценцирани даватели на социјални услуги работеа на формирање на „Мрежа на даватели на социјални услуги’’.  
На 17-ти Јануари во просториите на Едукативниот центар М6, се одржа презентација на иницијативата за формирање на мрежата. Настанот го поддржаа и високи претставници на меѓународни институции, како Г-нот Steffen Hudolin Head of Cooperation in the EU Delegation to North Macedonia, Г-ѓа Росана Дуџиак постојан координатор на ОН во С. Македонија и  Г-нот Харолд Фугер , Аташе за социјални прашања на Австриското Министерство за социјални прашања, здравство, грижа и заштита на потрошувачите, кои учествуваа во панел дискусијата и им дадоа поддршка на граѓанските организации за остварување на оваа идеја.
Сите присутни организации го поддржаа формирањето на мрежата и ја истакнаа важноста од зајакнато, заедничко делување и влијание во интерес на ранливите категории кои ги подржуваат.

Следејќи ги глобалните текови за развој и зачувување на културната традиција и одбележувањето на 20 години од донесувањето на Конвенцијата за заштита на нематеријалното културно наследство, од страна на УНЕСКО https://ich.unesco.org/en/anniversary, Македонското Монтесори Здружение и Монтесори центарот развија програма за децата на предучилишна возраст која има за цел развој на свест и почит кон нематријалното културно наследство во светот.
Во програмата особено внимание се обрна на запознавање со македонското нематријално културно наследство.
Благодарение на учениците од Насоката за традиционална музика и игра, при ДМБУЦ"Илија Николовски-Луј", деца од Монтесори центарот се запознаа со народни инструменти, свадбената носија од Скопска блатија, шеговитата народна песна ,,Зајко кукурајко’’.
Сите заедно го заиграа „Зајачкото оро“ и ја „замесија првата погача од невестата во куќата на момчето“. 
Благодарност до Директорката на ДМБУЦ"Илија Николовски-Луј", м-р Даница Стојанова, наставниот кадар и учениците

Монтесори центарот е регистриран Центар за ран детски развој кој им овозможува на децата да ги развијат своите потенцијали до максимум, во согласност со сопствениот развоен ритам. Следејќи ги Монтесори принципите, на децата им овозможуваме развој на нивните когнитивни, социјални и емоционални вештини и компетенции.
Подготвената околина со Монтесори материјали и обучениот кадар го водат детето кон развој на самодоверба и сигурност во своите потенцијали, но и високо ниво на свест за потребите на другите.

Групите се наменети за деца од 3 до 6 години.

ПОПЛАДНЕВНА ПРОГРАМА
      - Вторник и Среда од 17.30 до 19.30 часот

ИНДИВИДУАЛНА РАБОТА
      -  Индивидуална работа со деца со потешкотии во развојот на возраст од 2 до 10 години

Дополнителни информации секој ден после 16.00 часот на следните телефони:
 078 418 470 - Попладневна група
077 577 491 - Индивидуална работа

или на e-mail: montessori.macedonia@yahoo.com

Македонкото Монтесори Здружение е првото здружение на граѓани кое во рамките на Проектот за подобрување на социјалните услуги на МТСП и Светска банка, се лиценцираше како давател на социјалната услуга - Дневен центар за деца со попреченост за индивидуални третмани.
Овој центар се отвара благодарение на поддршката и добрата соработка со Општина Карпош.
Центарот е наменет за деца на возраст од 2 до 10 години и ќе биде фокусиран на давање индивидаулна поддршка со цел развој на потенцијалите на децата и вклучување во редовниот воспитно образовен систем, односно инклузирање во локалната градинка, локалното училиште заедно со своите другарчиња од соседството.

Во центарот ќе бидат опфатени 32 деца кои ќе бидат поддржани од страна на специјални едукатори и рехабилитатори и психолози, кои имаат дополнителна едукација за Монтеори пристапот.
Користењето на оваа социјална услуга е врз основа на препораките кои за секое дете ги дава Стручното тело за функционална проценка.
Покрај работата со децата предвидена е и психосоцијална поддршка на семејства и советодавна работа со воспитувачите и наставниците од градинките и основните училишта од Општина Карпош.
Во текот на месец јули Министерката за труд и социјална политика, Г-ѓа Јована Тренчевска и Градоначалник на Општина Карпош, Г-дин Стевчо Јакимовски го посетија центарот и подетално се запознаа со неговата работа.