Во рамките на активностите за меѓународна соработка на  ММЗ минатата седмица Монтесори центарот го посетија Корељка Жепец, дефектолог-професор рехабилитатор и Хрвојка Вукович исто така професор рехабилитатор од Загреб. Дефектолозите од Хрватска имаа можност да ја опсервираат работата во Монтесори центарот и заедно со Монтесори педагозите да дискутираат за своите искуства за примена на Монтесори методот во работа со деца со посебни потреби.  

Монтесори центарот во соработка со трговскиот центар Ramstor Mall, а во рамките на нивните активности во „Клубот на Сезнајковци“,  реализираше едукативна работилница на тема: „Да ја запознаеме Холандија“. Почесен гостин на работилницата беше амбасадорката на Холандија во Македонија, г - ѓата Marriët Schuurman.  

Децата, учесници во работилницата, на еден интересен и креативен начин се запознаа со најважните карактеристики на Холандија, нејзината местоположба, природните богатства, националните обележја, кралското семејство, традиционалната холандска облека, националната кујна, познатите личности од оваа земја...Очекувано, најголем интерес побудија приказната за ветерницата, полињата со лалиња, националната обувка - кломпата и велосипедот како најмасовно превозно средство во Холандија. Во креативниот дел од работилницата, децата изработуваа  ветерници, лалиња и боеја цртежи со национални обележја од Холандија.