UFUK'UN NEBİ ÖZEL EĞİTİM ANAOKULU, турскиот партнер во проектот „Growing with coordination“, во периодот од 01 до 05 јуни беше домаќин на завршните активности и не запозна со системот на посебно и инклузивно образование во Република Турција, со фокус на предучилишното воспитание и образование на децата со попреченост.
Низ петодневната посета беше истакнато значењето на креирање на активности и средина за стимулирање на моторниот развој на децата со попреченост и беа посетени градинка за деца со попреченост и инклузивна градинка.
Особено импресионираше високо развиената донаторска свест на заедницата во Ескишекир која овозможи изградба на градинка за децата со попреченост според најсовремените светски стандарди.
Посетата на Турција овозможи да имаме работен состанок со претставници на Монтесори здружението од Истанбул, со кои веќе се договори опсервација на нивни претставници во нашиот Монтесори центар во следниот период.

Минатата седмица имавме можност да ги споделиме нашите искуства во развојот на Македонското Монтесори Здружение и креирањето на активности кои одговараат на потребите на локалната заедница и националните стратегии за подобрување на воспитно-обазовната дејност и социјалната заштита.
Во соработка со NALAS (Network of associations of local authorities of South-East Europe) и проектот на GIZ -  Social Inclusion of Disadvantaged Groups in the Western Balkans не посетија колеги од Дневниот центар за деца со попреченост од Истог, Република Косово, кои покажаа особен интерес за воспоставувањето на социјалната услуга - Центар за индивидуална поддршка на деца со попреченост, начинот на организација на поддршката на децата и нивните семејства.
Гостите имаа можност директно да ја опсервираат работата со децата, да поразговараат со неколку родители, да се запознаат со основните карактеристики на Монтесори педагогијата и да проследат неколку студии на случај.

Како дел од програмските активности на Македонското Монтесори Здружение, овој месец заврши уште еден циклус на Воведна обука за Монтесори падагогија.
На завршната сесија М.П. (психолог) истакна „Длабочината и широчината на наставната програма обезбедија темелно разбирање на филозофијата на Монтесори, од нејзините историски корени до нејзината практична примена во училницата. Практичната обука со материјалите на Монтесори беше особено вредна, што ми овозможи од прва рака да видам како овие алатки го олеснуваат учењето преку истражување и откривање. Понатаму, акцентот на техниките за набљудување ме опреми со вештини за поефективно разбирање и одговор на индивидуалните потреби на децата. Програмата не само што ги исполни, туку и ги надмина моите очекувања, обезбедувајќи цврста основа за имплементација на принципите на Монтесори во наставна практика.“

На наше големо задоволство изминатата седмица бевме посетени од г-ѓа Габи Штефан, Монтесори експерт од Германското Монтесори Здружение. Г-ѓа Габи Штефан е еден од трите експерти кои беа ангажирани од германска влада со цел поддршка за осовременување на системот на детска заштита во РМ и во 2003 година ја започнаа обуката за Монтесори педагогија. Таа е долгогодишен следбеник и поддржувач на активностите на Македонското Монтесори Здружение и пред се советник во практикувањето на  Монтесори педагогијата. 
По неколкудневната опсервација во групите и дискусијата со вработените таа даде позитивно мислење за нашата работа што за нас е потврда за обезбедениот квалитет.

Во насока на обезбедување квалитетни и достапни социјални услуги во заедницата изминатиот период, 11 Граѓански организации (СОС ДЕТСКО СЕЛО; Хуманост; Хера, Македонското Монтесори Здружение, Порака – Неготино, Кризен Центар Надеж, Отворена Порта, ХОПС, Инклузива,  Здружение на лица со церебрална парализа и други попречености- Велес и КРИК) кои се лиценцирани даватели на социјални услуги работеа на формирање на „Мрежа на даватели на социјални услуги’’.  
На 17-ти Јануари во просториите на Едукативниот центар М6, се одржа презентација на иницијативата за формирање на мрежата. Настанот го поддржаа и високи претставници на меѓународни институции, како Г-нот Steffen Hudolin Head of Cooperation in the EU Delegation to North Macedonia, Г-ѓа Росана Дуџиак постојан координатор на ОН во С. Македонија и  Г-нот Харолд Фугер , Аташе за социјални прашања на Австриското Министерство за социјални прашања, здравство, грижа и заштита на потрошувачите, кои учествуваа во панел дискусијата и им дадоа поддршка на граѓанските организации за остварување на оваа идеја.
Сите присутни организации го поддржаа формирањето на мрежата и ја истакнаа важноста од зајакнато, заедничко делување и влијание во интерес на ранливите категории кои ги подржуваат.

Следејќи ги глобалните текови за развој и зачувување на културната традиција и одбележувањето на 20 години од донесувањето на Конвенцијата за заштита на нематеријалното културно наследство, од страна на УНЕСКО https://ich.unesco.org/en/anniversary, Македонското Монтесори Здружение и Монтесори центарот развија програма за децата на предучилишна возраст која има за цел развој на свест и почит кон нематријалното културно наследство во светот.
Во програмата особено внимание се обрна на запознавање со македонското нематријално културно наследство.
Благодарение на учениците од Насоката за традиционална музика и игра, при ДМБУЦ"Илија Николовски-Луј", деца од Монтесори центарот се запознаа со народни инструменти, свадбената носија од Скопска блатија, шеговитата народна песна ,,Зајко кукурајко’’.
Сите заедно го заиграа „Зајачкото оро“ и ја „замесија првата погача од невестата во куќата на момчето“. 
Благодарност до Директорката на ДМБУЦ"Илија Николовски-Луј", м-р Даница Стојанова, наставниот кадар и учениците

Монтесори центарот е регистриран Центар за ран детски развој кој им овозможува на децата да ги развијат своите потенцијали до максимум, во согласност со сопствениот развоен ритам. Следејќи ги Монтесори принципите, на децата им овозможуваме развој на нивните когнитивни, социјални и емоционални вештини и компетенции.
Подготвената околина со Монтесори материјали и обучениот кадар го водат детето кон развој на самодоверба и сигурност во своите потенцијали, но и високо ниво на свест за потребите на другите.

Групите се наменети за деца од 3 до 6 години.

ПОПЛАДНЕВНА ПРОГРАМА
      - Вторник и Среда од 17.30 до 19.30 часот

ИНДИВИДУАЛНА РАБОТА
      -  Индивидуална работа со деца со потешкотии во развојот на возраст од 2 до 10 години

Дополнителни информации секој ден после 16.00 часот на следните телефони:
 078 418 470 - Попладневна група
077 577 491 - Индивидуална работа

или на e-mail: [email protected]